Trochi a Hwyrddyfodiaid i'r Gymraeg

Mae gan yr Awdurdod wasanaeth sy'n cefnogi hwyrddyfodiaid Cymraeg a'u hysgolion. Mae’r ymyrraeth yn cychwyn cyn gynted ag y bydd y plentyn wedi trosglwyddo i ysgol cyfrwng Cymraeg o fewn yr Awdurdod, a bydd y gwasanaeth yn parhau i gefnogi’r plentyn hyd nes bydd y plentyn wedi cyrraedd lefel ddigonol o gaffaeliad.

Mae plant yn anghredadwy o lwyddiannus wrth gaffael ieithoedd newydd ac mae’r mwyafrif helaeth yn parhau yn eu lleoliadau cyfrwng Cymraeg, gan fwynhau llwyddiant mawr yn eu hail iaith. Mae digon o gefnogaeth ar gael i’r plant, eu teuluoedd a’r ysgolion er mwyn sicrhau bod y daith yn gweithio i bawb.

O ganlyniad i gynnydd sylweddol yn nifer y plant sy'n dymuno trosglwyddo i ysgolion cyfrwng Cymraeg yn ystod y blynyddoedd diwethaf mae'r Awdurdod ar hyn o bryd yn edrych ar ffyrdd o gynyddu a datblygu eu darpariaeth bresennol. Bydd rhagor o wybodaeth am y datblygiadau hyn ar gael yn fuan.

Hwyrddyfodiaid Cynradd

Rydym yn croesawu ac yn cefnogi unrhyw blentyn sy’n dymuno trosglwyddo i ysgol gynradd cyfrwng Cymraeg. Mae ein pecyn cymorth yn cynnwys:

• Cefnogaeth allgymorth Hwyrddyfodiaid Cymraeg o fewn yr ysgol nes bod y plentyn wedi cyrraedd lefel ddigonol o gaffaeliad
• Pecyn cymorth i'r athrawes a'r staff cynorthwyol
• Opsiwn i’r plentyn fynychu ein Canolfan Iaith ‘Cynefin’ am gyfnod o bythefnos er mwyn cael profiad trochi dwys gyda’n tîm o athrawon trochi profiadol cyn dychwelyd i’r ysgol a pharhau gyda chefnogaeth allgymorth
• Pecyn cymorth i rieni/teuluoedd a chyfle i gwrdd ag aelod o’r tîm Trochi Cymraeg er mwyn cael cyngor a gwell dealltwriaeth o’r cymorth rydym yn ei gynnig a hefyd i ddysgu mwy am sut y gallwch chi fel rhieni/gwarcheidwaid gefnogi’r plentyn

Ymweld a'r wefan

Cwestiynnau cyffredin

C: Am ba hyd bydd fy mhlentyn yn cael cymorth gan y tîm Trochi Cymraeg?
A: Bydd eich plentyn yn cael ei gefnogi nes ei fod wedi cyrraedd lefel dda o gaffaeliad Cymraeg ac yn hyderus yn ei allu ei hun. Bydd pob plentyn yn cael ei gefnogi am gyfnodau amrywiol o amser yn dibynnu ar eu hoedran, ymgysylltiad, a llawer o ffactorau eraill. Byddwn yn parhau i gefnogi'r plentyn hyd nes fydd ddim ein hangen ar y plentyn mwyach.

C: Dydw i ddim yn siarad Cymraeg ac rwy’n poeni bydd fy mhlentyn yn methu oherwydd hyn.
A: Daw mwyafrif y plant sy’n mynychu ysgolion Cymraeg Wrecsam o gartrefi di-Gymraeg. Mae’r ysgolion a’r gwasanaethau cynhaliol wedi hen arfer cefnogi’r plant a’u teuluoedd ac mae gan bob plentyn gyfle cyfartal i ddod yn rhugl a ffynnu gyda’n cefnogaeth. Er nad ydych chi’n siarad Cymraeg mae yna ffyrdd eraill y gallwch chi gefnogi eich plentyn fel ymweld â’r Llyfrgell leol am lyfrau Cymraeg, chwarae Radio Cymru neu gwylio rhaglenni S4C gyda’ch gilydd (gydag isdeitlau), annog eich plentyn i ddefnyddio’r Gymraeg os ydych chi’n dod ar draws Cymraeg person sy'n siarad yr iaith ac wrth gymryd diddordeb yn yr hyn maent yn ei ddysgu.

C: Beth os byddaf yn penderfynu symud fy mhlentyn ond ei fod yn parhau i gael trafferth i ddysgu'r iaith?
A: Rydym wedi derbyn arian yn ddiweddar gan Lywodraeth Cymru i gynyddu ein capasiti gwasanaeth a chefnogaeth ac o ganlyniad rydym wedi agor canolfan cefnogi caffael iaith. Bydd y ganolfan hon yn cael ei defnyddio i redeg cyrsiau sy'n cynorthwyo plant gyda'u taith caffael iaith. Mae cyrsiau wedi’u cynllunio’n benodol i gefnogi gwahanol agweddau ar gaffael iaith ac o ganlyniad ‘rydym yn hyderus bydd cwrs priodol ar gael i’ch plentyn. Am ragor o wybodaeth cysylltwch â'ch ysgol neu anfonwch e-bost atom: trochi@wrexham.gov.uk

Trochi’r Gymraeg ar gyfer Addysg Uwchradd

Mae’r cynllun Trochi Cymraeg yn galluogi disgyblion i drosglwyddo o ysgolion cynradd cyfrwng Saesneg i gael mynediad i addysg cyfrwng Cymraeg yn Ysgol Morgan Llwyd fel y nodir yn y Canllaw Rhieni i Wasanaethau Addysg yn Wrecsam 2023/2024. Gofynnir i chi ystyried a fyddai’n fanteisiol i’ch plentyn, yn nes ymlaen mewn bywyd, fod yn rhugl mewn dwy iaith a all mewn sawl ffordd gyfoethogi cyfleoedd yn enwedig gyda Strategaeth Llywodraeth Cymru: Cymraeg 2050 yn anelu at gyrraedd miliwn o siaradwyr Cymraeg. Mae Llywodraeth Cymru yn darparu rhagor o wybodaeth i rieni/gofalwyr wrth ystyried addysg cyfrwng Cymraeg ar y ddolen isod: https://cymraeg.gov.wales/learning/schools/Welshmediumeducation/?lang=cy

Gall disgyblion Blwyddyn 6 sy’n mynychu ysgolion cyfrwng Saesneg ar hyn o bryd ond sy’n dymuno cael mynediad i addysg uwchradd cyfrwng Cymraeg, gael cymorth drwy’r cynllun trochi llwyddiannus sydd wedi’i leoli yn Ysgol Morgan Llwyd. Yma caiff disgyblion trochi eu cefnogi nes iddynt ddod yn rhugl, gan ymuno â dosbarthiadau prif ffrwd erbyn dechrau Blwyddyn 9. Cyn iddynt ymuno ar y cwrs trochi, bydd disgyblion yn cael y cyfle i gael eu cefnogi yn eu hysgol gynradd gan ein Tîm Allgymorth o fis Ionawr. Yn dilyn gwyliau’r Sulgwyn byddant yn cychwyn ar gwrs rhagflas o chwe wythnos yn Ysgol Morgan Llwyd. Mae hwn yn gyfle gwych I'r dysgwyr brofiadu’r uned Trochi heb ymrwymo’n llawn i'r cynnig. Os bydd eich plentyn yn ymuno â chwrs trochi Ysgol Morgan Llwyd ac yn cael anhawster i addasu i addysg cyfrwng Cymraeg byddant yn gallu dewis addysg uwchradd cyfrwng Saesneg ym mis Medi. Dros y deng mlynedd diwethaf mae nifer fawr o ddisgyblion wedi trosglwyddo i Ysgol Morgan Llwyd o ysgolion cynradd cyfrwng Saesneg ac wedi addasu’n ddi-dor i addysg cyfrwng Cymraeg, gan gyflawni’n dda iawn yn eu cymwysterau TGAU.

Mae'r cwrs yn rhoi pwyslais ar ddysgu trwy amrywiaeth o weithgareddau hwyliog. Rydym yn cyflwyno’r Gymraeg gan gymryd rhan mewn gemau ac amrywiaeth o weithgareddau hwyliog, podlediadau, cyfansoddi, kung fu, garddio, coginio, prosiectau gohebu a thrwy teithiau rheolaidd i ymarfer eu sgiliau Cymraeg y tu allan i’r ysgol. Rydym wedi derbyn adborth ardderchog gan rieni/gwarcheidwaid a phlant ac yn sicrhau bod ein cwrs yn canolbwyntio ar syniadau a arweinir gan ddisgyblion. Rydym yn rhoi pwyslais ar sicrhau bod eu lles yn ganolig i bob dim ac mae niferoedd ein grwpiau trochi llai yn addas iawn ar gyfer cefnogi, ymgysylltu a bondio. Mae sicrhau hapusrwydd plentyn yn rhoi cyfle teg iddynt ffynnu. Rydym yn cyfarfod ac yn gohebu’n rheolaidd gyda rhieni / gwarcheidwaid er mwyn sicrhau eu bod yn cael eu diweddaru’n aml ar gynnydd a datblygiad eu plentyn.

Ymweld a'r wefan

Cwestiynnau Cyffredin

C. A fydd fy mhlentyn yn colli allan ar weithgareddau'r rhai sy'n gadael Blwyddyn 6 tra'n mynychu'r cwrs Cymraeg?
A. Rydym yn hapus i blant ddychwelyd i'w hysgolion cynradd ar gyfer unrhyw ddigwyddiadau gadael / gweithgareddau mabolgampau / gwibdeithiau diwedd blwyddyn, ond gofynnwn yn garedig i chi roi gwybod i ni am unrhyw ddyddiadau na fydd eich plentyn yn bresennol.

C. A fydd fy mhlentyn yn treulio amser gyda'i gyfoedion prif ffrwd?
A. Bydd eich plentyn yn treulio tua 65% o’i amser yn yr uned drochi Cymraeg gyda’r myfyrwyr trochi Cymraeg eraill a gweddill yr amser yn mynychu rhai pynciau yn y brif ysgol gyda’u cyfoedion trochi a rhai mewn dosbarthiadau cymysg gyda disgyblion y prif ffrwd.

C. Beth fydd yn digwydd os nad yw fy mhlentyn yn mwynhau’r cwrs trochi?
A. Gobeithiwn fod pob plentyn yn mwynhau’r profiad ond mae cyfnod blasu Blwyddyn 6 yn gyfle da i’r plentyn brofi’r hyn sydd gennym i’w gynnig ac yn rhoi cyfle iddynt benderfynu os ydynt am barhau ym Mlwyddyn 7 ai peidio.

C. Nid ydym yn gallu siarad Cymraeg ac rydym yn poeni na fyddwn yn gallu cefnogi ein plentyn. A fydd angen i mi ddysgu Cymraeg hefyd?
A. Er y byddem yn eich annog i ymddiddori yn nhaith eich plentyn ac yn hapus i’ch cynghori gyda gwybodaeth ynglyn a ble i gael mynediad i gyrsiau a gynhelir yn lleol, nid oes disgwyliad ar ein rhan i chi ddysgu Cymraeg. Mae dros 70% o’r plant sy’n cael mynediad i ysgolion cyfrwng Cymraeg yn Wrecsam yn dod o gartrefi di-Gymraeg felly rydym wedi hen arfer cefnogi eu dealltwriaeth a chaffael iaith.

Newyddion diweddaraf