Dathlu Llwyddiant Darpariaeth Trochi a Cefnogi Hwyrddyfodiaid i'r Gymraeg yn Wrecsam
13/02/25
Mae'r gwasanaeth trochi a chefnogi hwyrddyfodiaid i'r Gymraeg yng Nghyngor Bwrdeistref Sirol Wrecsam wedi cyflawni llwyddiant nodedig, yn ol adroddiad diweddar gan Estyn, Arolygiaeth Ei Mawrhydi dros Addysg a Hyfforddiant yng Nghymru. Mae'r adroddiad hwn, sy'n seiliedig ar arolygiad a gynhaliwyd ym mis Rhagfyr 2024, yn dangos y camau sylweddol a gymerwyd i hyrwyddo'r iaith Gymraeg a chefnogi lles disgyblion trwy drefniadau trochi arloesol ac effeithiol.
Gweledigaeth ar gyfer Ffyniant yr Iaith Gymraeg
Mae arweinwyr yn Wrecsam wedi dangos gweledigaeth glir i sicrhau bod yr iaith Gymraeg yn ffynnu o fewn yr awdurdod lleol. Mae'r trefniadau trochi a chefnogi hwyrddyfodiaid wedi esblygu'n sylweddol ers 2018, gydag ymdrechion pwrpasol i gefnogi'r sectorau addysg gynradd ac uwchradd. Mae sefydlu dau ganolfan trochi Cymraeg, Canolfan Cynefin yn Ysgol Min y Ddôl a Throchi Wrecsam, canolfan uwchradd yn Ysgol Morgan Llwyd, wedi bod yn allweddol yn ystod y daith hon.
Mae'r adroddiad yn nodi bod llwyddiant y gwasanaeth trochi yn gwreiddio o arweinyddiaeth ysbrydoledig rheolwr y ddarpariaeth, sydd wedi meithrin diwylliant cefnogol wrth hyrwyddo'r iaith Gymraeg. Mae'r defnydd effeithiol o grantiau llywodraeth wedi bod yn hanfodol wrth ddatblygu'r trefniadau hyn ac mae disgwyliadau uchel ac ymrwymiad y rheolwr wedi creu tîm ymroddedig sy'n meithrin balchder disgyblion yn yr iaith Gymraeg ac yn cefnogi eu lles.
Mae arweinwyr wedi ffurfio perthnasoedd cryf gyda ysgolion lleol, disgyblion, a rhieni, gan sicrhau dull cydweithredol o drochi iaith Gymraeg. Maent wedi gweithio'n agos gydag ysgolion i gynllunio’r ddarpariaeth gan gefnogi disgyblion a'u teuluoedd wrth drosglwyddo i addysg cyfrwng Cymraeg. Mae hyrwyddo dysgu proffesiynol staff wedi bod yn ffocws allweddol, gyda’r arweinwyr yn ymchwilio'n frwdfrydig i arferion dwyieithrwydd ac yn cynnal dysgu proffesiynol mewn ysgolion eraill. Mae hyn wedi cael effaith gadarnhaol ar sgiliau iaith Gymraeg staff a disgyblion ar draws yr awdurdod. Mae Claire Rayner, Pennaeth Ysgol Min y Ddôl, ysgol gynradd cyfrwng Cymraeg yng Nghefn Mawr yn canmol y gwasanaeth: “Mae’r ddarpariaeth Drochi Cymraeg, Cynefin, wedi bod yn amhrisiadwy wrth godi hyder, hunan gred a gallu’r plant â’r Iaith Gymraeg. Rydym wedi gweld gwelliant amlwg yn eu caffaeliad a'u parodrwydd. Mae eu balchder yn eu cyflawniadau i'w weld trwy eu rhwyddineb cynyddol wrth sgwrsio a chyfathrebu. Mae'r staff cefnogol a gofalgar, ynghyd â'r profiadau gwych a gynigir ganddynt, yn gryfder yn y ddarpariaeth ac yn gymorth i sicrhau bod pob disgybl yn cerdded i ffwrdd gyda gwên ar eu hwyneb, cred yn eu calon a balchder yn eu hymdrechion. Dydi'r plant yn aml ddim eisiau gadael!”
Ychwanegodd Michelle Firth, Pennaeth Brynteg C.P sydd wedi bod yn cefnogi'r rhaglen trochi uwchradd yn ystod y blynyddoedd diwethaf: "Mae’r gwaith trosglwyddo sy'n digwydd ar gyfer y disgyblion yn fy ysgol wedi creu argraff gadarnhaol iawn arnaf. Rydym wedi cael nifer o ddisgyblion yn dewis y llwybr trochi Cymraeg o'n hysgol, sy'n bennaf yn siarad Saesneg, ac roeddwn yn poeni'n wreiddiol am ba mor dda y byddai rhai ohonynt yn addasu ond rwyf wedi bod yn falch iawn o weld pa mor dda mae'r disgyblion yn cyflawni. Rydym wedi mwynhau gweld ein cyn-ddisgyblion yn cymryd rhan mewn fideos dathlu ac yn clywed pa mor dda maent wedi addasu. Cyn gynted ag y caiff disgyblion eu lleoliad, rydym yn derbyn cyswllt i ddechrau gweithio ar gefnogi'r trosglwyddo. Mae'r plant yn edrych ymlaen at y ymweliadau hyn ac yn mwynhau eu hamser ffocws. Mae llawer o gydlynu yn ystod y trosglwyddo hirach i sicrhau bod y disgyblion yn gwneud y gorau o'u hamser yno ond hefyd yn sicrhau nad ydynt yn colli allan ar unrhyw ddigwyddiadau sy'n digwydd yn eu tymor olaf yn y gynradd."
Egni a Brwdfrydedd y Staff Addysgu
Un agwedd nodedig o'r gwasanaeth trochi Cymraeg yn Wrecsam yw egni a brwdfrydedd y staff addysgu, eu hangerdd dros yr iaith Gymraeg a'u hymrwymiad i'r disgyblion sy'n creu amgylchedd dysgu bywiog a deniadol. Canmolodd Estyn athrawon y gwasanaeth fel modelau rôl ieithyddol cadarn, sy’n ddefnyddio dulliau addysgu amlsynhwyraidd effeithiol a symudiadau corfforol i hwyluso dysgu effeithiol a chefnogol. Parhaodd Estyn gan ychwanegu bod y dull arloesol hwn nid yn unig yn gwella sgiliau iaith y disgyblion ond hefyd yn meithrin awyrgylch dosbarth cadarnhaol a chyfranogol. Mae'r perthnasoedd cryf rhwng staff a disgyblion yn seiliedig ar ymddiriedaeth a pharch at eu gilydd, gan gyfrannu at gymuned ddysgu gefnogol a hapus. Dywedodd Awel Roberts, athrawes yn y ganolfan drochi Uwchradd: “Rwy'n hynod falch o fod yn athrawes trochi Cymraeg, ac mae'n fraint wirioneddol rhannu'r profiad anhygoel hwn gyda phlant mor weithgar ac ysbrydoledig. Rwy'n edmygu eu hymroddiad a'r ymdrech anhygoel maen nhw'n ei roi i ddysgu'r iaith. Mae gweld nhw'n dod yn siaradwyr rhugl mewn cyfnod mor fyr yn rhyfeddol, ac mae'r balchder maen nhw'n ei gymryd yn eu taith iaith Gymraeg yn ysbrydoledig. Mae eu hangerdd a'u hymrwymiad yn atgoffa ni'n barhaus o'r hyn y gellir ei gyflawni trwy waith caled a phenderfyniad. Mae'r plant hyn yn ysbrydoliaeth i ni i gyd.” Rhannodd Iwan Owen-Ellis, Pennaeth Dros Dro yn Ysgol Morgan Llwyd lle mae'r ganolfan drochi uwchradd wedi'i lleoli, adborth cadarnhaol hefyd ar y berthynas rhwng yr ysgol a'r gwasanaeth, datblygiad dysgwyr a threfniadau pontio: "Mae'r gwasanaeth trochi wedi bod yn llwyddiant ysgubol yma yn Ysgol Morgan Llwyd. Mae'r disgyblion yn cael eu meithrin yn yr uned drochi gan staff ymroddedig a gofalgar. Mae'r disgyblion yn cael eu trosglwyddo'n effeithiol i ddod yn aelodau gwerthfawr o gymuned Ysgol Morgan Llwyd wrth ddilyn y cwricwlwm cyfan yn Gymraeg erbyn blwyddyn 9."
Mae adroddiad Estyn yn nodi bod y rheolwr wedi manteisio ar bob cyfle i arloesi wrth hyrwyddo trefniadau trochi, yn enwedig wrth wella sgiliau llafar y disgyblion. Mae'r adroddiad yn tynnu sylw at ganlyniadau cadarnhaol yr ymdrechion hyn, gyda llawer o ddisgyblion yn gwneud cynnydd da yn eu sgiliau siarad Cymraeg ac yn datblygu agweddau cadarnhaol tuag at yr iaith. Mae'r ddarpariaeth yn cefnogi lles disgyblion yn effeithiol, gan sicrhau eu bod yn teimlo'n ddiogel ac yn hapus, sydd yn ei dro yn hyrwyddo agweddau cadarnhaol tuag at ddysgu.
Mae Eleri Vaughan Roberts, rheolwr Tîm Gwasanaeth Trochi Cymraeg, yn myfyrio ar y daith: "Mae wedi bod yn daith wych hyd yma gan weld y gwasanaeth yn ffynnu o ganlyniad i gefnogaeth grantiau Llywodraeth Cymru, cefnogaeth gan deuluoedd ac ysgolion, ac yn bwysicaf oll, llwyddiant a hapusrwydd ein dysgwyr. Nhw yw'r stori lwyddiant go iawn yma ac ni ellir tanamcangyfrif eu hymdrechion. Mae'r niferoedd sy'n dymuno cael mynediad at ein darpariaethau yn cynyddu flwyddyn ar ôl blwyddyn, ac o ganlyniad, rydym wedi sicrhau buddsoddiad cyfalaf gan Lywodraeth Cymru i adeiladu uned uwchradd bwrpasol i'n helpu i ddatblygu ein cynnig ymhellach. Rydym hefyd wedi sicrhau cynlluniau i ddarparu cynnig trochi cadarn o fewn ein sector cynradd yn dilyn rhaglen beilot lwyddiannus. Heb os, ni ellid bod wedi cyflawni'r llwyddiant heb waith tîm effeithiol, ac mae'n rhaid rhoi clod i bob aelod o'r tîm am eu hymrwymiad, eu cefnogaeth, ac am fynd yr ail filltir i sicrhau bod ein darpariaeth yn cefnogi pob dysgwr, teulu ac ysgol."
Gan atgyfnerthu'r adborth yn yr adroddiad am y daith gadarnhaol a'r gefnogaeth a brofwyd gan deuluoedd, ychwanegodd Eryn Hardy, rhiant a ddewisodd y llwybr hwn ar gyfer ei merch yn ôl yn 2022: "Symudon ni i Gymru pan oedd ein merch hanner ffordd trwy flwyddyn 5 ar ôl cael ei haddysgu yn Lloegr cyn hyn, ac mewn llai na 12 mis roedd hi yn y Trochi Haf fel rhan o'i chyfnod trosglwyddo i'r ysgol uwchradd. Bum wythnos o drochi yn ddiweddarach ac roedd fy rhestrau chwarae haf yn llawn enwau bandiau na allwn eu hynganu ac o ran y geiriau; i gyd yn Gymraeg. Yna'n rhyfeddol o fewn llai na blwyddyn academaidd (gyda fy rhestrau chwarae yn dal i fod yn Gymraeg) roedd fy merch yn trosglwyddo I'r brif ffrwd ar ôl dysgu'r sgiliau angenrheidiol i lwyddo’n annibynnol mewn ysgol Gymraeg. Rwy'n dal i ryfeddu wrth wrando arni pan rydyn ni allan yn symud rhwng ieithoedd yn ddi-hid. Roedden ni wir yn poeni pan ddewisodd ysgol Gymraeg y byddai hi tu ol i bawb yn academaidd, wedi'i rhwystro gan ei bod hi'n ail iaith iddi ond dangosodd y profion cenedlaethol nad oedd unrhyw ostyngiad yn ei sylfaen wybodaeth allweddol. Cadwodd staff Trochi ddrws agored iddi hi ac i ni fel rhieni, felly roeddem yn gwybod beth i'w ddisgwyl a sut i gefnogi. Rydyn ni newydd ddewis ei hopsiynau, ac rwy'n falch iawn ein bod ni wedi cymryd y naid ac wedi ymddiried yn y cynllun Trochi. Mae ganddi nawr ail iaith, y gred y gall ddysgu ieithoedd ychwanegol ac mae hefyd yn siarad iaith ei gwlad gartref. Llwyddiant. Llwyddiant. Llwyddiant!"
Gwnaeth rhiant arall, Gemma Ketteringham, gyfeirio at elfen gynhwysol a meithringar y ddarpariaeth gan nodi: "Roedd y dosbarth trochi yn anhygoel i fy mab. Roedd awyrgylch ac ethos y dosbarth yn diwallu ei anghenion ychwanegol ac roedd yn ffynnu mewn ffordd nad oeddem wedi'i gweld o'r blaen. Ni stopiodd eu hymrwymiad pan symudodd i addysg Gymraeg y brif ffrwd chwaith - fe wnaethant barhau i gynnig cymorth ychwanegol gyda'r iaith Gymraeg a'i anghenion emosiynol. Gwnaeth y gofal, y gefnogaeth a'r dealltwriaeth gan y staff wahaniaeth gwirioneddol iddo!"
Nododd adroddiad Estyn fod Gwasanaeth trochi a chefnogi hwyrddyfodiaid i'r Gymraeg yn Wrecsam yn rhoi dysgwyr wrth wraidd ei hymdrechion. Mae eu lleisiau'n rhan annatod o gynllunio gwersi, gan sicrhau bod eu hanghenion a'u dewisiadau'n siapio'r profiad addysgol. Mae'r gwasanaeth yn mynd y tu hwnt i ddysgu iaith, gan feithrin ymdeimlad o hunaniaeth, balchder a hyder yn y dysgwyr. Mae cefnogaeth lles a strategaethau meithrin hyder yn cael eu hintegreiddio'n effeithiol i'r cwricwlwm ac arferion dyddiol. Mae'r gwasanaeth yn hyrwyddo agweddau cadarnhaol tuag at ddysgu Cymraeg, gan sicrhau bod dysgwyr yn teimlo'n hapus, yn ddiogel ac yn gymhellol. Mae'r dull cyfannol hwn yn helpu dysgwyr i ffynnu'n academaidd ac yn bersonol, gan gefnogi datblygiad emosiynol a chymdeithasol dysgwyr ochr yn ochr â'u sgiliau ieithyddol. Trwy ddarparu profiadau amrywiol, mae'n sicrhau bod y Gymraeg yn cael ei gweld fel iaith fyw gyda buddion ymarferol. Mae perthnasoedd cryf, gyda ysgolion lleol, disgyblion a rhieni, yn sail i lwyddiant y gwasanaeth. Wrth ofyn am adborth gan ddysgwyr roedd y neges yn glir: maen nhw'n mwynhau ac yn gwerthfawrogi'r cyfle i ddysgu'r iaith, mae'r lleoliadau'n eu galluogi i ddatblygu hyder a chael hwyl wrth ddysgu ac maen nhw'n falch o’u datblygiad cyflym.
Camau nesaf a argymhellir gan Estyn yw i'r Cyngor gynllunio'n fwy pwrpasol i sicrhau cyfeiriad strategol clir ar gyfer trefniadau trochi Cymraeg, yn enwedig yn y sector cynradd er mwyn cefnogi datblygiad pellach y ddarpariaeth lwyddiannus bresennol.
Cymraeg 2050
Mae pwysigrwydd cynyddol yr iaith Gymraeg yng Nghymru yn ran annatod o strategaeth uchelgeisiol Cymraeg 2050 gan Lywodraeth Cymru, sy'n anelu at sicrhau miliwn o siaradwyr Cymraeg erbyn 2050. Mae'r weledigaeth hon yn tynnu sylw at arwyddocâd diwylliannol a chymdeithasol yr iaith Gymraeg, gan bwysleisio ei rôl wrth siapio hunaniaeth genedlaethol fywiog a chynhwysol.
Mae addysg cyfrwng Cymraeg yn chwarae rhan hanfodol yn y weledigaeth hon. Mae'r Bil Iaith Gymraeg ac Addysg (Cymru) yn cefnogi hyn trwy sicrhau bod pob disgybl yn cael y cyfle i ddod yn siaradwyr Cymraeg hyderus erbyn diwedd eu haddysg orfodol. Mae'r dull hwn nid yn unig yn cadw'r iaith ond hefyd yn gwella sgiliau gwybyddol, ymwybyddiaeth ddiwylliannol, a chyfleoedd gyrfaol yn y dyfodol i ddysgwyr.
Mae'r Gwasanaeth Trochi Cymraeg a hwyrddyfodiaid i'r Gymraeg yn darparu cefnogaeth hanfodol i fyfyrwyr sy'n trosglwyddo i addysg cyfrwng Cymraeg ac yn cynnig rhaglenni iaith dwys a chefnogaeth wedi'i theilwra i helpu disgyblion hwyr i gyflawni rhuglder ac integreiddio'n ddi-dor i'w hamgylchedd addysgol newydd. Wrth ddewis yr opsiwn yma yn Wrecsam, gall teuluoedd fod yn sicr bod eu plentyn mewn dwylo diogel ac y byddant yn ffynnu gyda'r holl gefnogaeth sydd ar gael gan y gwasanaeth. Mae'r Gwasanaeth hefyd yn chwarae rhan annatod wrth gefnogi amcanion Cynllun Strategol Cymraeg mewn Addysg yr Awdurdod Lleol gyda'i rôl wrth gefnogi dysgwyr, ysgolion, cymuned, trosglwyddo, cynhwysiant a hyfforddiant i'w staff ac ysgolion ar draws y fwrdeistref. Maent yn cydnabod eu rôl a'u dylanwad fel gwasanaeth ehangach na chefnogaeth o fewn yr ystafell ddosbarth ac yn chwarae rhan weithgar wrth gefnogi, hyfforddi a rhwydweithio'n lleol, yn rhanbarthol, yn genedlaethol ac yn rhyngwladol!
Amlygodd adroddiad Estyn giplun ar arfer effeithiol a welwyd wrth gefnogi'r ysgolion cyfrwng Saesneg yn Wrecsam, gan nodi: “Mae arweinwyr yn trefnu cyfleoedd gwerthfawr i gefnogi dysgu proffesiynol ar draws yr awdurdod drwy ddarparu hyfforddiant caffael iaith effeithiol. Yn ddiweddar, maent yn hyrwyddo datblygiad medrau Cymraeg staff a disgyblion rhai o’r ysgolion Saesneg lleol yn llwyddiannus. Mae staff y ganolfan yn teilwra cefnogaeth fwriadus i ddiwallu anghenion yr ysgolion yn unigol ac yn cydweithio i ddarparu gweithgareddau ysgogol i gefnogi Adroddiad ar Gyngor Bwrdeistref Sirol Wrecsam Rhagfyr 2024 5 datblygiad medrau’r disgyblion ar draws y cwricwlwm. O ganlyniad, mae hyder y staff i addysgu’r Gymraeg wedi cynyddu, sydd yn ei dro yn cael effaith gadarnhaol ar fedrau’r disgyblion. Yn ogystal, mae hyn wedi arwain at dwf yn niferoedd y disgyblion sy’n trosglwyddo i addysg uwchradd Gymraeg yn flynyddol. Bellach, mae hwn yn sylweddol uwch na’r targed a osodwyd gan yr awdurdod yn y Cynllun Strategol Cymraeg mewn Addysg (CSGA).” Cyfrannodd Richard Hatwood, Pennaeth Ysgol Eglwys Wirfoddol Gymorth Cristnogol yr Holl Saint yn Gresffordd, sydd wedi bod yn rhan o gynllun peilot a redir gan y gwasanaeth, y datganiad canlynol: "Mae wedi bod yn bleser gweithio ochr yn ochr â'r gwasanaeth i ddatblygu sgiliau iaith Gymraeg o fewn yr ysgol. Nid yn unig mae safonau sgiliau iaith Gymraeg y disgyblion wedi datblygu, mae eu hyder a'u gwerthfawrogiad o bwysigrwydd yr iaith a'r diwylliant Cymraeg hefyd wedi trawsnewid. Mae hyn i lawr i'r dull arloesol, hyblyg a chreadigol gan y tîm a'u hymrwymiad i gydweithio gyda ni."
Casgliad
Mae'r gwasanaeth trochi a chefnogi hwyrddyfodiaid i'r Gymraeg yng Nghyngor Bwrdeistref Sirol Wrecsam yn sefyll fel tystiolaeth o b?er arweinyddiaeth ymroddedig, staff addysgu ysbrydoledig a chefnogol, defnydd effeithiol o adnoddau, ffocws ar system gefnogi gydlynol a pherthnasoedd cymunedol cryf. Mae llwyddiant y gwasanaeth hwn yn eistedd nid yn unig yn hyrwyddo'r iaith Gymraeg ond hefyd wrth cefnogi lles a chynnydd addysgol disgyblion. Wrth i Wrecsam barhau i arloesi a gwella ei threfniadau trochi, mae'n gosod esiampl disglair i eraill ei ddilyn wrth feithrin dwyieithrwydd a balchder diwylliannol.
Mae'r adroddiad hwn yn ddathliad o waith caled ac ymrwymiad pawb sy'n ymwneud â'r gwasanaeth trochi Cymraeg yn Wrecsam, ac mae'n tynnu sylw at effaith gadarnhaol eu hymdrechion ar y gymuned.
Gwybodaeth pellach am y cynnig:
Mae Cynefin, y brif ddarpariaeth Trochi a chefnogaeth Hwyrddyfodiaid i'r Gymraeg Cynradd yn Wrecsam, wedi ymrwymo i feithrin sgiliau iaith Gymraeg trwy raglen draws-gwricwlaidd arloesol, hwyliog ac ymgysylltiol. Mae'r ganolfan yn cynnig llu o gyfleoedd i ddysgwyr wella eu hyfedredd yn yr iaith Gymraeg, gyda phwyslais arbennig ar ddatblygu sgiliau llafar, tra'n rhoi blaenoriaeth i les y dysgwyr. Gellir dod o hyd i lif cyson o bostiadau sy'n dangos eu gweithgareddau wrth ddilyn eu cyfrifon cyfryngau cymdeithasol: @cynefinwrecsam. Mae gan ddysgwyr y cyfle i fynychu'r ganolfan bedwar diwrnod yr wythnos fel rhan o raglen gynhwysfawr chwe i saith wythnos. Yn dilyn hyn, mae cwrs dilynol ar gael yn ystod y tymor dilynol. Yn ogystal, darperir allgymorth o fewn eu hysgolion cartref rhwng y cyrsiau, fel rhan o raglen cymorth cyn ac ôl ofal. Mae'r dull cyfannol hwn yn sicrhau datblygiad cadarn o sgiliau iaith gan sefydlu Cynefin fel carreg sylfaen bwysig wrth gefnogi addysg cyfrwng Cymraeg yn Wrecsam.
Mae Trochi Wrecsam, y brif ddarpariaeth Trochi Uwchradd yn Wrecsam, yn cefnogi dysgwyr o Flwyddyn 5 – 9 yn ystod eu cyfnod trosglwyddo i addysg uwchradd cyfrwng Cymraeg o ysgol cyfrwng Saesneg. Cyn y cwrs trochi llawn ym Mlwyddyn 7, mae'r holl ddysgwyr sydd wedi mynegi diddordeb yn y llwybr yn cael eu cefnogi gyda sesiynau allgymorth rheolaidd ac yn cael cynnig cwrs blasu chwe wythnos cyn yr Haf. Mae hyn yn cefnogi teuluoedd i wneud y dewis priodol a bod yn saff o’u dewis cyn ymrwymo'n llawn. Mae'r holl ddysgwyr yn cael eu cefnogi i ddatblygu sgiliau iaith Gymraeg ar draws y cwricwlwm, gan eu hymgysylltu mewn amrywiaeth o weithgareddau a'u harfogi â'r sgiliau i lwyddo ac i eistedd yn hyderus ochr yn ochr â'u cyfoedion yn y brif ffrwd pan fyddant yn barod. Dilynwch eu cyfrifon cyfryngau cymdeithasol @trochi_wrecsam i gael blas ar fywyd yn y ganolfan.
Cwestiynau Cyffredin
C: Am ba hyd y bydd fy mhlentyn yn cael ei gefnogi gan y tîm?
A: Bydd eich plentyn yn cael ei gefnogi hyd nes eu bod wedi datblygu lefel dda o fedrusrwydd Cymraeg ac yn hyderus yn eu gallu eu hunain. Bydd pob plentyn yn cael ei gefnogi am hyd amrywiol o amser yn dibynnu ar eu hoedran, eu hymrwymiad, a llawer o ffactorau eraill. Byddwn yn parhau i gefnogi'r dysgwr hyd nes nad oes angen ein cymorth arnynt mwyach.
C: Nid wyf yn siarad Cymraeg ac rwy'n poeni y bydd fy mhlentyn yn methu oherwydd hyn.
A: Mae'r mwyafrif helaeth o blant sy'n mynychu ysgolion cyfrwng Cymraeg yn Wrecsam yn dod o gartrefi ble nad ydynt yn siarad Cymraeg. Mae'r ysgolion a'r gwasanaethau cefnogi yn fwy na pharod i gefnogi'r plant a'u teuluoedd ac mae gan bob plentyn gyfle cyfartal i ddod yn rhugl a ffynnu gyda'n cefnogaeth. Er nad ydych yn siarad Cymraeg, mae ffyrdd eraill y gallwch gefnogi eich plentyn megis ymweld â'r Llyfrgell leol am lyfrau Cymraeg, chwarae Radio Cymru neu wylio rhywfaint o S4C gyda isdeitlau, annog eich plentyn i ddefnyddio eu Cymraeg os dewch ar draws person sy'n siarad Cymraeg ac i ddangos diddordeb yn yr hyn y maent yn ei ddysgu.
I ddysgu mwy am y cynnig trochi a chefnogaeth ar gyfer hwyrddyfodiaid i'r Gymraeg, ewch i wefan benodedig Wrecsam ar gyfer addysg cyfrwng Cymraeg: www.agw.cymru. Gellir cyfeirio unrhyw ymholiadau hefyd at [email protected]. Bydd y ddarpariaeth trochi uwchradd yn cynnal Noson Agored ar 17eg o Chwefror am 5yp yn Ysgol Morgan Llwyd hefyd. Bydd croeso cynnes i bawb.
I ddarllen yr adroddiad diweddaraf gan Estyn ar gyfer y trefniadau Trochi a chefnogi Hwyrddyfodiaid i'r Gymraeg yng Nghyngor Bwrdeistref Sirol Wrecsam: https://www.estyn.llyw.cymru/darparwyr/wrexham-county-borough-council-2-cy/